ಪಯಣ

ಬಾಳ ಪಯಣವೇ ಹೀಗಂತೆ

ಬಾಲ್ಯದಾಟ,ವಿದ್ಯಾಭ್ಯಾಸ,
ಮತ್ತೆ ಕೆಲಸಕ್ಕಾಗಿ ಅಲೆದಾಟ 
ಮದುವೆ ಮಕ್ಕಳು ಮರಿ
ಅಂತೂ ಇಂತೂ 
ಒಂದು ಹಂತಕ್ಕೆ ಬರುವಲ್ಲಿ
ದೋಣಿ ನಿಲ್ಲದು ಒಂದೇ ಕಡೆ 
ಹುಟ್ಟು ಹಾಕುತ್ತಲೇ ಇರಬೇಕು||

ಬಿರುಗಾಳಿ,ಕುಳಿರ್ಗಾಳಿ,
ಧೋ ಎಂದು ಸುರಿಯುವ ಮಳೆ
ಮತ್ತೊಮ್ಮೆ ಮಂದಾನಿಲ 
ಬರುವಅಲೆಗಳನ್ನೆಲ್ಲಾ ಎದುರಿಸಿ
 ಸಾಗುವ ಹೊತ್ತಿಗೆ ಸಾಕೋ ಸಾಕು||

ಹೀಗೆಲ್ಲಾ ಇರುವಾಗ 
ಸುಂದರ ಸೂರ್ಯಾಸ್ತ,
ಇರುಳಲ್ಲಿ ಮಿನುಗುವ ತಾರೆ
ಉಹೂ..ನೋಡಲು ಪುರುಸೊತ್ತಿಲ್ಲ 
ಅಥವಾ ಗುರಿ ತೇರುವ ತವಕದಲ್ಲಿ
ಸಮತೋಲನ ತಪ್ಪುವ ಆತಂಕದಲ್ಲಿ 
ಎಡವಟ್ಟಾಗುತ್ತಿರಬೇಕು ||

ದೋಣಿ ಮುಪ್ಪಾಗಿ 
ಅಂಬಿಗನ ಕೈ ಸುಸ್ತಾಗಿ
ಒಂದು ದಿನ ಪಯಣ ನಿಲ್ಲುತ್ತದೆ
ಅಥವಾ ಪಯಣ ನಿಂತಂತೆ ಅನಿಸುತ್ತದೆ
ಅಷ್ಟರಲ್ಲೆ ಹೊಸ ದೋಣಿ -ಯಾಂತ್ರೀಕೃತವಂತೆ 
ಮತ್ತೆ ಹೊಸ ಪಯಣಿಗರು
ಹೊಸ ಪಯಣ 
ಶುರುವಾಗಬೇಕು||